從各到客个進一步討論

【文／范文芳∕國立清華大學中國語文學系退休教授】

 

一、各字个字形解釋

　　從甲骨文、鐘鼎文、小篆个字形結構來看，上半部係象腳趾之形，下半部係古早人類挖地窖居住个口形。有人步入居住个舍內，故所【各】係會意字，最初之字意係來到、抵達。

　　說文个解讀，【異辭也，從口從攴，攴者有行而止之，不相聽也。】說文將止解釋為攴，故所解為各別之相異辭，假使用古文字學个講法，各本意為來到、抵達。各別、各異係假借个用法。

二、 從各到格、客

　　格字係從木各聲，各亦兼表意，本意指木製欄格，引申為規格、表格、及格、格調、品格。再引申為動詞，有抵觸、格鬥之意，像格殺勿論、格格不入。

　　客字係從宀各聲，各亦兼表意，本意指來到穴窖之賓客，說文个解釋【寄也，從宀各聲。】客原指來賓、過客，今廣泛使用為客卿、遊客、俠客。係名詞。

　　用為動詞像客居他鄉、客座教授，再引申使用為主體、主觀之相反有客體、客觀。

三、 各字衍伸出來个多種發音

　　參考王力先生个漢語語音史，各，上古音｛gak｝元代官話音｛go｝現代華語音｛ger｝，洛，上古音｛lak｝中古音｛lok｝元代官話音｛lo｝現代華語音｛luo｝，路，上古音｛lak｝南北朝時官話音｛lo｝，中古時官話音｛lu｝，現代華語音｛lu｝，假使參照今日台語，可列出字音演變如下

　　1. 各，台福語音｛gok｝台客語音｛gok｝台華語音｛ger｝。

　　2. 洛，台福語音｛lok｝台客語音｛lok｝台華語音｛luo｝。

　　3. 路，台福語音｛lo｝台客語音｛lu｝台華語音｛lu｝。

　　4. 客，台福語音｛kiek/kieh｝台客語音｛hak/kak｝台華語音｛ker｝。

　　5. 落，台福語音｛lok/lak/loh/lau｝像月落烏啼落文讀音lok，物件落落來音lak loh lai， 落雨音lo ho，落氣音lau kui，落翅兒音lau shit a。台客語音｛lok/lau/lo｝像落雨、落水都音lok，田駁落忒音lau，雨水稀落音 lo。台華語音｛luo//la/lau｝像掉落音luo，丟三落四音la，落單、落枕音lau。

四、漢文化在台灣个現代化

　　 1. 台語用漢字書寫，必須溯原漢字个古音、古文、繁體字，根據台語个語音、辭意、講法，福老話音Hoklo ue不可寫成河洛話，客家人稱華語个龍眼為牛眼，音ngiu ngian，原住民稱溫泉、瀑布為Vulai可借漢字書寫為烏來。

　　 2. 台語常用語好空、當選、落氣，不可寫成好康、凍蒜、漏氣。

　　 3. 生活在現代社會，有必要釐清種族、語言、習俗、性別、人權認同摎政治、法制、國家之間个區別，對生活在台灣个客家人來講，做得講自家个祖先來自中國，使用个語言係漢語方言客家話，用漢字書寫台灣客家話係我等个選擇，講到國家認同，當然我等享受个權利、盡个義務都係受著台灣政府个管轄。

　　 4. 我係客家人，我講客家話，我用漢字書寫客語，我个國家認同係台灣。

　　 　　
（海陸腔） 范文芳教授 聲檔 — 從各到客个進一步討論





　

▲BACK